Ikan Semah tauka Ikan Empurau?

Uji teka dulu, ikan nama ti bisi ba gambar nya? Pelaba aku agi mayuh bedau nemu midaka ikan semah tauka ikan empurau. Bisi mega madahka churak kala ikan, bisi ngembuan bibir ti panjai tauka pandak, pemanjai tubuh sereta mayuh agi indikator sida ke nemu. Mina urang ti telaba sereta landik dalam pengawa bemain sungai amai nemu ni bagi ikan semah tauka empurau. Bemain sungai ba aku ditu iya nya urang ti semampai berikan ngena chara nyala, mukat, nimbak ikan sereta mayuh bengkah chara.
Ikan semah enggau ikan empurau udu disebutka bala mensia mayuh laban pengelunak isi iya ti nyamai enti dipanduk ngena chara stim. Ulih ga ikan tu diguring rangkai tang kitai udah rugi ari segi penyamai isi iya pia mega baka vitamin nya nyau lenyau lebuh maya diguring rangkai. Kesuah iya bansa kitai Dayak udu amai deka ngasam ikan semah enggau ikan empurau. Mina diperuk enggau garam kasar sereta berau guring. Diperam enggau pengelama 3 minggu sigi udah nyamai diempa kitai. Lebuh maya manduk kasam tu tadi tau mega digaga bisi ai mimit tauka diguring minyak. Ikan semah enggau empurau tu ukai semina nemu diempa bala bansa Dayak tang bansa kitai menyadi cina, tambi enggau melayu mega nemu.
Pemayuh menua udah ditemu aku di Sarawak sigi enda telabanka bansa menyadi kitai cina Foochow di Sibu dia udu bebelika ikan semah kelebat agi ikan empurau. Tu amat tampak lebuh maya sida iya nyambut Taun Baru Cina. Bansa menyadi kitai cina dipelilih menua bukai pan bisi mega meli tang sigi enda tetapatka sida di pelilih menua Sibu enggau Kapit.
Utai ti ngasuh bangat alit ati iya nya bisi urang sanggup meli siku ikan empurau ti dijual enggau rega RM6,000 lebih. Pekara tu amai nyadi di Pasar Tamu di Kapit dia dalam taun 2010 tu tadi. Peminta ikan empurau enggau semah sigi udu dipinta lebuh maya ari besai cina. Laban rega sekilo ikan semah enggau empurau ti berega dia bansa Dayak udu begigaka ikan empurau tu. Nyau baka kena loteri mih tudah enti bisi bulih ikan empurau. Asai ka ke dalam mimpi ko sekeda ti udah kala bulih ikan empurau nya tadi. Pengudah sida bulih tadi dia sida deka nyual terus nuju ngagai tamu tauka nyual ngagai urang pemborong.
Dalam dua taun ke udah, dia mayuh amai jerita udah pansut dalam suratkhabar tauka internet madahka ikan empurau tu amai ulih ditupi kitai baka ikan ke bukai tang mina chara nya enda sama. Engka nya lebih pedis agi bebanding baka nupi ikan keli enggau ikan talipia. Ari pansik sida ke nemu dia ikan empurau tu tadi digerupka dalam Famili Cyprinidae. Sampai ke saritu mega agi bedau sida ke landik mansik chara bakani nernak ikan empurau tu.
Ari buah randau enggau urang ti kala begigaka ikan empurau sereta semah dia sida madahka endur diau ikan empurau tu sigi ba ulu sungai din ti bisi bebatu besai sereta batu karangan. Ba dia mega sigi udah temu kitai ai sungai ti chiru sereta deras. Nya mih kebuah makin besai buka kompeni balak di ulu din, dia ai sungai nyau majak keruh lebuh maya ujan lebat. Lebuh maya aku enggau urang begiga ikan semah di menua Ulu Baram dia aku tetemuka ikan semah nya tadi balat udu gemuk/beminyak laban ti makai buah ensurai ti bisi ba tebing sungai. Taun 2010 tu tadi, dia balat endar buah dipterokap dalam kampung jerung bebungai. Buah ensurai ti udah cukup mansau lalu labuh ke ai sungai lalu nya mih nyadi pemakai endar ikan semah enggau empurau. Kebuah pia laban aku nguji meruti perut ikan semah ti bisi bulih ba pukat ti ditan kami. Nyau belenying ai pendai ketegal minyak/gemuk ikan semah tu lebuh maya dikirah. Lemak ikan semah tu tadi enda dibuai ngapa. Minyak nya tadi ulih dinyadika kitai nyau sebaka minyak buah engkabang. Wangi amai asi enti digulaika enggau minyak ikan semah. Siti pengiruh ngintu lemak/gemuk ikan semah iya nya nuan deka muai tai ba perut. Enti enda dibuai, dia nuan deka ngasaika pait ba minyak lebuh maya iya udah mansau dipanduk. Lemak/gemuk ikan semah ti udah diintu nya tadi diengkah dalam periuk lalu terus dipanduk ngena api ti mit. Nyau naka pengalama dia minyak/gemuk iya tadi deka melepu sereta bekau perut tai ti enda ulih dibuai nyau tenggelam ba dasar periuk. Laluh perut, tai sereta empedu ti pecah ngasuh minyak nya pait. Ari pengalaman aku empu, enti minyak tu tadi dikena nuan ngecalka asi pulut, sigi naka penyamai iya!
Lebuh maya berikan dia rindu amai narit pukat lebuh maya bisi ngena. Nyau besai betis ikan semah ti diulih kami. Sida ke landik nyelam sambil nimbak ngena senapang ikan, bulih amai laban ba lubuk din sida iya ulih milihka pemesai ikan. Enti beraban raban begiga malam ari dia sida deka bepekit ngigaka ikan semah ti paling besai. Nya mih lebuh maya nuan nemuai ngagai bilik sida di menua ulu baram, dia nuan ulih beratika iku ikan semah tauka ikan empurau ti udah ditetak nya dilekatka sida ba dinding. Makin besai kerembai iku ikan nya, reti iya makin besai mih saiz ikan ti bulih sida.


Siti karakter ikan semah tu iya nya iya enda siga lebuh maya malam ari. Pia mega iya deka begerup enggau pangan diri di dalam lubuk din. Ukai semua sungai ti bebatu sereta karangan bisi ikan semah enggau empurau. Nya begantung enggau pemersi ai sungai mega.
Siti mega info ti ditemu aku ba menua ulu baram ditu iya nya chara sida bejualka ikan semah tauka ikan empurau. Rega iya mina begantung enggau pemerat dibaruh ari sekilo tauka lebih ari sekilo. Nya ba peneka ati diri empu lebuh maya meli.
Labanka projek betupika ikan empurau tu udah amai nyadi nyata baka ti diriput sida dalam suratkhabar, dia aku mesan ngagai bala kitai ti bisi ati deka nguji nernak ikan tu sigi diasuh nemu pekara tu ari pun sampai ke ujung. Ukai mina ninga sereta nerima segala ari urang bukai tang diri empu perlu ngaga pansik sebedau nernak iya. Ari riput suratkhabar dia bisi siku urang dagang di Kuching udah mujur nernak ikan empurau. Pelaba aku asai ikan empurau ari ai sungai asal enggau ti diternak engka enda sama asai. Jaku aku nya tadi mina sagam ati aku din laban kitai nemu karakter ikan tu tadi sigi ba ai sungai ti chiru sereta deras. Engka chara pemakai iya ti kompleks nya mih nentuka penyamai isi iya. Kitai sama bela enda nemu. Sama-sama mih kitai mansik nya.
Pengawa dagang tu ukai ngena kapital ratus ribu tang sigi amai manggai ngagai juta ringgit. Semua urang deka nemu kati baka chara deka nernak ikan empurau laban iya sigi tetap ngenataika asil ti manah sereta ulih dieksport ke menua tasik. Jaku tangkan aku ba ditu iya nya kitai sama-sama nyaga pemersi sungai enggau rampa menoa awaka ikan empurau tu bedau diau ba endur asal iya. Pia mega kena jemah ke anak ucu kitai dudi ari ila.