Classified:The Borneo Post, Page C12, 12 Oktober 2013

Wrong Time at the wrong place: It could be happen to you

Sharing wrote in Dayak-Iban language:

Dalam artikel tu aku deka bekunsi enggau bala pemacha senentang pemerinsa ti diasai iya dalam pejalai pengidup siku urang putih benama Michael Anthony Green ti berasal ari menua Houson, Texas. Nyadi Green tu tadi udah dipasung polis enggau pengelama 27 taun di dalam lukap ketegal penyalah ti ukai diakun digaga iya empu.


Green diatu nyau udah bediri ba muah mayuh ba panggau siti sekula benama Houston High School bekunsi enggau jerita sereta motivasi nuju anembiak sekula. Kes baka Green tu ukai nyadi ba iya aja tang mayuh urang mega ketegal ti salah peda sereta testimoni ari saksi lebuh maya indu ti kena pasung nya.

Lebuh maya bekunsi jerita enggau anembiak sekula dia iya mesan enggau erat madahka naka ulih nyeliahka diri ari penanggul. Anang engkah diri empu ba endur ti salah sereta maya ti salah laban nya ulih nyadi ba sapa-sapa.

Green diatu ti berumur 46 taun udah dilepaska ari rumah pasung maya 30 Julai pengudah ari pemutus peresa DNA ti madahka tancut jin ti dikena mangsa pasung nya nadai madahka Green bisi enggau ngereja pengawa masung nya.

Green mega diantara penyampau 265 iku ti enda disabit ngaga penyalah dalam pengawa jai di menua Amerika Syarikat pengudah ari taun 1989 bepun ari pemansut peresa DNA nya dikenyadika bukti, nitihka padah ari sida Innocence Project.

Green engka enda ulih pansut ari rumah pasung enti iya enda belajarka nyau betaun-taun dalam penemu undang-undang sereta iya bisi begagaka petisyen nuju mahkamah dikena iya pansut ari rumah pasung.

Green madahka iya nyau sempama baka bepanggalka bup undang-undang sereta macha nya ninting ari. Ari nya tadi ulih nulung iya dalam keterubah pengawa ba bidang undang-undang pengudah iya pansut ari rumah pasung.

Dalam empat bulan ti petama pengudah iya dilepas ari rumah pasung, Green ngusung ngagai opis kaban iya nya benama Bob Wicoff. Bob tu tadi mih luyar ti nulung iya pansut ari rumah pasung sereta naka ulih deka nulung kaban Green ti bukai senasib sebaka iya.

Kelimpah ari nya, Green ngeluangka masa iya penuh enggau bala sida menyanak sereta bangat amat alit ati enggau pemansang teknologi laban enda kala tepansa bakanya nyau bekau iya ti lama ba rumah pasung.

Mayuh bengkah utai deka dijeritaka Green tang ari segi pampas duit ti patut diberi perintah Texas, sigi iya enda bejakuka utainya. Iya mina meri komen madahka ngambi duit nya ninting ari.

Pekara ti dikerinduka iya nya bepeluang deka bekunsi jerita enggau urang rebak baru laban ba juluk ati iya din enda ngasuh teparuk baka nasib iya.

“Aku rindu ngereja pengawa tu sereta aku ngajihka ulih betemu sekeda ari sida,” pia ko jako Green. Iya disabitka penyalah lebuh maya iya berumur 18 taun.

Polis benung begigaka 4 iku suspek ti masung siku indu ba kerita churi serea tetemuka Green benung bejalai enda jauh ari nya. Polis bisi nanya indu ti udah kena pasung, engka Green bisi enggau ngereja penyawa jai nya tang indu nya meri jaku tangkan sigi nadai.

Seminggu pengudahnya, Green ditangkap laban ditemu enchuri kerita. Utai ti ditemu iya mina udah ditangkap enchuri kerita sereta dipadah indu nya bisi enggau masung.

“Aku bejaku enggau bala bakih di dalam rumah pasung sama enggau sida anembiak rebak baru iya nya ngemansutka diri ari penanggul,”ko jaku Green.

“Laban sistem sigi enda bemain enggau nuan.” Bekunsika jerita ba pengawa jai ti udah digaga ulih nulung kena nyuman sereta lebih badas agi struktur, jaku ari Karen Wolff, siku pekerja enggau Innocence Project.

“Semua kes iya nya nyelaie sereta enda ulih diputarka ba tiap urang,”jaku Wolff.

Green mega mayuh utai diajar, dipadah Michea Carter, iya nya siku direktor dalam Theather arts ba Westbury High School. Lebuh maya sesi betanya saut, anembiak sekula nanyaka Green ari bengkah macham ngambika chunto baka pengidup dalam rumah pasung sereta asai ati lebuh maya ditan dalam rumah pasung tajapan sigi nyengala enda salah.

Ari leka saut Green nya mayuh udah nyedarka sida anembiak sekula kelebih agi iya madahka pemarai indai iya lebuh maya iya agi ba dalam rumah pasung.

Jaku ajar sereta moral ari jerita bakatu iya nya besyukur enda nyadi ba tubuh kitai empu. Tajapan pia nya ngajar kitai reti pengidup enggau pengeliat ati deka terus mansang sereta bekunsi pengalaman enggau urang bukai. Uji meda Green, tajapan iya udah lama ditan ba rumah pasung tang iya sigi semampai deka bekunsi jerita nya awaka urang ti bisi ba sekeliling iya enda nengah utai ti sama baka iya.

(Jerita tu diambi ba AFP, 2011)

Proposed Hardcopy of Penemuruai e-Mag

Any idea or comment for this future hardcopy cover for Penemuruai e-Mag?

I am glad to hear some feedback from other bloggers.

TQ!

Scandal Mostly Happened at Office

Pecaya ke enda, skandal suah nyadi ba nalan endur kitai kereja? Kati enda pia dih laban kitai udah ngena masa ti lama ari pagi nyentuka lemai begulai enggau pangan diri ba dalam ofis tauka endur bukai. Enti nitihka pansik ari siku penulis bup “The Art of Cheating-Jessica Dorfman Jones”, dia ia madahka bisi 60 persen urang ti udah nirika rumahtangga udah bekaul enggau pengawa skandal di nalan endur kereja. Reti aku iya nya nalan endur kereja enda ngira ba ofis tauka ba luar ofis tang tu sigi nyadi kelebih agi kitai ti gawa enggau mayuh seksyen. Tambah nya mega bisi 67 persen sida manijer udah kala berskandal enggau urang di baruh sida tauka bisi pengerindu enggau pangan diri tajapan udah bisi rumahtangga tauka sulu ati.
Dalam leka lagu udu amai isu tu dikelaguka. Ngambika chunto baka lagu Andrewson Ngalai bejudul “Adong Belalai..” Pandak jaku, tu meh dikumbai kitai “..makai belalai…”
Kes bakatu suah amai nyadi ba ofis laban pengelama kitai bekereja ari pagi nyentuka lemai udah ngena masa enggau pengelama 8 jam. Tu mina dikira ari pengelama kereja dalam seari tang bedau agi dicampur enggau lebuh maya makai di kopitiam sereta pulai ari kereja.
Pengerindu belalai tu bepun ari mayuh faktor. Keterubah iya ari struktur rumah tangga ti enda kukuh. Ngambika chunto laki bini bisi ngembuan kereja kediri empu, pagi ari sama nurun kereja udahnya betunga mua mina lebuh makai malam. Makin ari pengerindu sereta komunikasi nyau udah putus ketegal kereja ti kelalu mayuh sereta enda ngerandau penanggul diri empu. Kitai sama bela nemu enti udah pulai kereja sigi lelak meh asai tubuh nyau mata lanjur deka tinduk. Bisi ga sekeda madahka munyi bakatu “…enda gawa nya, pagila ulih meh berandau..sigi semampai bisi laban diau ba siti perabung…” Sigi amai jaku bakanya tang ingat meh, utai saritu enda sama enggau pagila.



Bepun ari pengurang kasih sayau sereta bejaku enggau pangan diri nya ngasuh pengerindu nyau majak pudar. Lebuh maya di ofis kekadang bisi ga tetemuka kaban ti sanggup ninga jerita sereta penanggul diri empu. Enti kaban kitai nya nyau nemu ngaturka masalah kitai dia bisi ga ati nyamai mimit sereta gaga laban bisi endur enggau urang ngenduh. Ari nya tadi, dia iya ulih mandingka penyiru di rumah enggau di ofis. Ari beganti ari, pengerindu enda ulih ditagang nyau ngepunka skandal ba ofis.
Nyadi kitai deka nemu ulah skandal ba nalan kereja tu nyadi. Kesuah ia urang ti bisi skandal deka pulai laun ke rumah. Alasan ti dipadah sida iya nya mayuh kereja deka diadu. Paling mudah disebut mulut sida ianya “overtime”. Nyau limpang nuju leka lagu penyayi Johnny Aman ga kitai, “…laban deka mayar lon washer machine..” Kitai pan enda nemu nama pengawa digaga sida nyau pulai tengah malam ari ofis. Enda patut ga overtime sampai ke tengah malam. Nyadi sapa ti bisi tekena bakatu, manah peresa enggau silik laban engka amat iya ngaga pengawa kereja ofis laban ke tudah mangku pangkat ti besai. Sapa mih enda irau enti laki tauka bini laun pulai ke rumah, agi sekali dua engka ulih tang nyau tetiap malam sigi ulih ngasuh carut pengujung iya.
Jaku ajar ari kes bakatu mudah aja iya nya kerja memanah ngidupka ruang bilik. Bala sida indu enggau laki nyau majak bajik sereta sigat ari taun beganti taun. Mulaika leka lagu ari niang Micheal Jemat “…dinga meh urang kereja, udah terima, anang enda nyaga bini enggau anak….”. Kira bakanya meh paut leka lagu enggau kes skandal ti suah nyadi ba nalan endur kereja.

Good news for farmer: Chili Price on Top, RM30/kg

Bala rayat menua Indonesia bangat ringat amai asai ati laban rega chabi udah niki nyau 10 kali ganda dalam kandang beberapa bulan sebedau tu sereta ngenusahka pengawa bebelika chabi nyau ngejungka nyadi aum ba semua urang ari sida indu ti nyadi suri rumah nyentukka Presiden Indonesia.

Gaya pemakai rayat sida menua ari Indonesia sigi enda ulih ninggalka chabi laban lauk sida sigi semampai pedas. Nyau teringat aku lebuh maya aku diau pengelama seminggu enggau betunggal aku di ladang kelapa sawit di menua Bintulu iya maya ari besai raya sida ti bepengarap Islam. Maya ari nya tadi dia kami duai bisi ngabang ngagai rumah bala pekeja iya ari menua Indonesia. Kelebat agi sida ari menua Indonesia tu bebansa Bugis ti bekereja naka pengalama di ladang kelapa sawit ba sitak menua Bintulu. Maya ngabang nya tadi, kami duai dienah sida mayuh macham lauk sereta kuih. Ngambika chunto baka dagin rendang, kuah kari, asi pulut sereta mayuh macham agi. Dipeda mata kasar, sigi chiru kuah kari sida tu tadi enti dibanding enggau lauk kari sida melayu ari menua Sarawak. Maya aku nyengkau kuah kari ti chiru nya tadi ba asi pulut dia betunggal aku munyi bakatu..

“…anang kelalu mayuh engkah kuah kari ba asi pulut nya, pedas asai iya lagi, enda alah empa nuan lagi..” bakanya iya madah enggau aku.

Bedau ambis ditelan ai liur iya tu tadi, dia aku nelai belalai madahka naka pemedas asai kuah nya tadi. Nyau pansut peluh lebuh maya nembuka asi pulut ti gulai enggau kuah kari nya tadi. Naka iya pemedas. Arinya aku nemu gaya pemakai sida ari menua Indonesia sigi pedas sereta sida udah teleba enggau barang pemakai ti pedas. Sida bisi madahka enda nyentuk asai makai enti nadai belaukka chabi.

Pulai baru kitai ngagai jerita penyuntuk chabi di menua Indonesia. Nyadi bisi sekeda sida ngelanggurka bala rayat nukar enda lama ba begunaka sos chabi ti dalam botol. Chabi ti ditanam sida nya mayuh udah rusak sereta mati laban gaya ujan ti enda nentu nyau ngejungka rega nya niki ari AS$10 ngagai AS$11 (RM30 ngagai RM33) dalam sekilogram iya nya lebih tinggi ari rega dagin.

Rega chabi mirah enggau gadung nya tadi majak niki ngagai 600 peratus ari AS$2.20 ke AS$15 sekilogram (RM6.70 ngagai RM45.60) ba bulan Disember ke udah sereta nimbulka pengirau ba sida ti deka meli. Ba beberapa ari dalam bulan Januari 2011, dia rega nya niki 10 kali ganda ngagai AS$22.20 (RM67.60) sekilogram.

Pekara tu ulih nyadi parah kelebat agi sida menua ti penuh enggau bala rayat penyampau 237 iku sereta penatai pemisi sida dalam AS$200 (RM609) dalam sebulan tang bisi mega sekeda ari sida sanggup deka melanja duit kena ngulihka chabi. Presiden Susilo Bambang Yudhoyono mega bisi buah runding kena ngemutarka penanggul iya nya ngasuh nanam kediri empu ba kebun sida.

Pekara suntuk chabi ukai naka nyadi ba menua Indonesia tang di menua India mega udah kurang ngeluarka daun teh sereta mega gaya ari tu nyau udah ngubahka asai dalam ai teh sida.
Sida ti rindu beirupka ai anggur peram (wine) kelebih agi di menua Perancis mega bisi ngasaika penanggul ti sebaka nuntung. Di menua Korea Selatan, ujan mega udah ngerusakka sayur kubis nyau nyentukka chara panduk kimchi iya mega bisi kurang nyamai.

Gecko/Kugo-Good Price!?

Ba pengujung taun 2009 nyentuk kediatu, dia aku suah amai ninga urang nusuika jelu kugo nya bendar amai digiga laban ti berega enti dijual sereta jerita madahka bisi ngembuan ubat kena nyumanka penyakit Aids. Pelaba aku ba seluruh Sarawak udah nemu jerita ba jelu kugo. Ukai nama aku madah bakanya laban bisi sekeda kaban aku ari Kuching, Sibu, Bintulu, Miri, Limbang nyentukka Lawas madahka jelu kugo nya bendar amai digiga urang.

Ngelansa ba cuping pending madahka rega siku jelu kugo nya ulih manggai beribu-ribu ringgit enti pemerat iya lebih ari 300 gram. Retinya enti pemerat nya dibaruh ari 300 gram, dia rega iya sigi enda besai enti dibanding enggau rega ti ngeluie ari 300 gram. Pekara ti ngasuh amai narit ati sida deka begigaka jelu kugo iya nya rega iya ti bangat mar enti dijual kelimpah ari pengasi deka nyumanka penyakit Aids. Amai nya kini? Kitai sama bela enda nemu kada jerita tu bendar tauka enda. Aku mega bisi bulih info madahka bisi keretas iklan nyau dilekatka ba dinding di belah pasar madahka deka meli tichak kugo diseretaka sida enggau numbor talipaun sida ejin.

Berita bakatu jampat amai ditemu urang nyau sempama baka api nyerarai kelebih agi ba pemansang teknologi pemadah baka Facebook, blog, Twitter sereta laman sesawang ti ngena konsep dagang. Sagam ba runding aku din, ukai kitai di Sarawak aja deka ngiga jelu kugo tu kada enda nyau udah ditemu urang ba menua Semenanjung tauka di Sabah din. Ba pemansang teknologi pemadah tu tadi mih ngasuh jerita nya jampat amai ditemu urang ba tiap pelilih menua.

Ba ditu kitai sama nyelungkarka info ba jelu kugo. Tichak kugo tu dalam raban Gekkonidae. Kugo tauka Gecko tu siti ari raban ti mit, jelu ti enda bisa sereta kelebat agi ditemu ba menua tropika. Bisi sekeda spesies ari raban tu deka ngeluarka bunyi ti bangat ingar baka “..kukgoo..kukgoo..kukgoo..”. Ticak kugo tu suah amai ditemu lebuh maya malam ari enti ba belah papan rumah sereta ba atas sadau siling. Iya ulih ba dini alai endur asal mih chelap. Ticak kugo tu ulih lekat ba endur mua ti licin mega laban tiap iti ba tunjuk jari iya bisi mangkuk ti mit baka bulu berus ti mayuh sereta ulih lekat.




Pemanjai ticak kugo tu ulih manggai ari 1.6cm nyentukka 35cm sereta jarang amai panjai, pala ti sedang iya tebal enggau iku iya ti enda kelalu pandak enggau tebal. Kulit luar ticak kugo tu bebintil baka igi manit. Kelebat agi spesies tu bisi dua iti mata ti diselaput enggau siti lapis membran sereta diberesi iya enggau lidah. Ticak tu tu mega makai indu utai tauka jelu bukai lebuh maya malam ari. Ticak kugo indu kesuah iya betelu enggau nyampau dua iti aja ti bewarna putih enggau kulit telu ti kering. Churak tichak kugo tu bisi kelabu, cokelat; lain mega ticak kugo ti ba siang ari di menua Madagascar enggau Afrika iya bechurak gadung terang enggau bintik ti churak oren tauka kuning; tichak kugo kayu ti bisi ba New Zealand bechurak gadung tauka bisi kuning sereta bisi betanda bintik pucat. Tichak kugo tu enda bisa tajapan bisi sekeda menua madahka sida tu bebisa. Jenis ticak kugo ti bisi ba Asia ngembuan tiga jenis bunyi, ngembuan saiz ti besai sereta ulih ngigit. Tichak kugo ti paling mit enggau reptilia ti paling mit ba dunya iya nya Jaragua sphaero. Tichak kuro ti paling mit tu ba National Park Jaragua enggau ba pulau Beata di menua Dominican Republic.

Di menua kitai, bisi siti tichak kugo ti udah dilindung terit iya nya “Niah Cave Gecko”. Tichak tu mina ditemu kitai ba dalam lubang batu di Niah. Arinya perintah udah neritka undang-undang awaka tichak tu enda diambi kitai sengapa.

Labanka udah ninga jerita madahka rega tichak kugo tu ti mar dia mayuh amai urang di menua kelebat agi nyau begiga ba dalam utan. Pengeka ati ti deka ngulihka duit nyau beribu-ribu dia bisi siti kes ti udah ngejungka siku bansa Iban di pelilih menua Sri Aman nyau bebadi labuh ari pun kayu laban ti deka ngulihka tichak kugo. Nama mih penyadi laban tichak nya rari sereta iya empu nyau bebadi. Tu mih siti ajar laban pengamu ati ti deka ngulihka duit enggau jampat. Pengelikun diri empu patut dikemeranka lebuh ngereja pengawa tang enti udah alah laban duit, nama-nama utai ulih nyadi.

Penemuruai E-mag, Vol.4

Ari Mija Editor …



Enda berasai nyau udah ngebak taun baru 2011. Awaka taun 2011 tu bulih jereki ti lebih manah agi bebanding taun ke udah. Betemu baru kitai dalam Penemuruai e-Mag, Volume 04.
Aku mayuh udah nerima e-mail ari raban pemacha madahka nganti naka pengelama Penemuruai e-Mag, Volume 4. Nyadi kami sebuat minta ampun enggau pengelaun deka ngeluarka Volume 4 laban bisi penanggul ti enda ulih diseliahka. Terima kasih enggau bala pemacha ti udah meri sukung penuh sereta sanggup nganti penatai Penemuruai e-Mag, Volume 4.
Pulai ngagai randau kitai ba Penemuruai e-Mag, Volume 04. Dalam volume tu agi bedaub aka selama iya. Pemanah dalam Volume 4 tu dia aku bisi nyemput penulis anembiak iban bekunsi penemu dalam pengelandik sida dalam pengawa sekula sereta ari buah penemu dalam jerita pengerindu antara menua. Mayuh agi info sereta jerita ti deka dikunsi enggau bala pemacha kelebih agi dalam perangsang pengidup kitai ba seari-ari.
Kepenudi iya, aku ngarapka bala pemacha tetap nyukung pengawa kami sereta ulih meri idea dikena mansang dalam bidang besadungka informasi diatu.
Terima Kasih! Selamat Macha…
Penekebang/Editor Penemuruai e-Mag:
Wilfred Sedau
wilfreds@samling.com.my , wilfred.sedau@gmail.com
E-mail Penemuruai e-Mag
penemuruai@yahoo.com

Anang Ngaga Nama Kompeni Pengujung Enggau uruf “A”

Kemaya aritu perintah udu ngasuh kitai nguji dalam pengawa dagang. Tu mih pengawa perintah ti udu deka ngasuh bala kitai bansa dayak nguji dalam pengawa nya. Bisi sekeda sanggup ngambi duit injau ari bank – Agrobank, Bank Rakyat kena ngepun dalam pengawa dagang betanam betupi, begaga ke rumah enggau mayuh utai agi ti enda ulih disebut ba ditu. Pengudah nya enggau urang berkursus dalam pengawa dagang bakani ngaga lessen, cara atur duit enggau utai bukai. Silik amai utai dipadah lebuh maya kitai enggau berkursus pengawa dagang.
Enti kitai deka bedagang dia kitai bisi empu nama kompeni. Nama kompeni tau mega nama kitai empu kini tauka nama ti ngasuh urang bukai ingat. Nyadi ba ditu aku deka bekunsi enggau bala pemacha bisi siti kes udah nyadi ba Kuala Lumpur din. Ketegal nama kompeni ti pengujung enggau uruf “A”, dia bisi kompeni ti udah rugi beratus ribu ringgit.
Lelaki ti ngereja pengawa nipu tu mina deka ngiga nama kompeni ti bepengujung ke uruf “A” aja. Kebuah iya deka ngiga kompeni bakanya laban senang bagi iya ngemansut ke duit ari cek duit. Ke diatu iya udah naban ke duit penyampau RM 500,000 ari dua buah kompeni.
Keterubah iya minta kereja enggau kompeni lalu madahka diri enda ngira penyampau gaji ti dibayar ngagai iya laban iya sigi suntuk deka ngiga kereja. Pengudah iya diterima kereja dia iya mega ngaga kompeni diri empu ti sama nama kompeni endur iya kereja tang mina bepengujung enggau uruf “I”
Lebuh maya General Manager Kujiwa Corporation ditanya, dia iya madahka lelaki nya bepakaian gap lebuh maya iya nurun interbiu. Tambah mega iya kala talipaun ngagai urang ti deka dirujuk (References) lebuh maya interbiu lalu madahka lelaki nya sigi manah. Pengudah iya bekereja enggau kompeni, dia General Manager baru tetemu ka 21 iti cek ti patut disimpan dalam bank udah lenyau. Lelaki nya rejister nama kompeni iya “Kujiwai” lalu nabanka duit penyampau RM 218,000.

Lelaki tu mega udah nipu kompeni ti benama “Aluta”. General Manager Aluta madahka lelaki tu landik amai nerangka bahan kena ngaga rumah. Pengudah lelaki tu bekereja dia iya selalu meri alasan laban enda ulih meri cek ngagai klien iya. Bos iya udah laun nemu laban lelaki nya udah nabanka duit penyampau RM 292,000 kurang dalam dua bulan. Lelaki nya rejister nama kompeni enggau “Alutai”.
Moral jerita tu iya nya enti ulih anang ngaga nama kompeni bepengujung enggau uruf “A”. Laban pekara tu udah nyadi di Kuala Lumpur din. Ngagai bala tauke tauka orang dagang anang ga lalu beguai nukar nama tang perlu nemu sapa enggau kita gawa. Temu silik urang ti bekerja enggau kita. Kekadang bala tauke enda nemu sapa urang enggau iya bekereja laban kelalu sibuk. Kes tu diambi ari artikel “The Star Online-8thJune2009.

Ikan Semah tauka Ikan Empurau?

Uji teka dulu, ikan nama ti bisi ba gambar nya? Pelaba aku agi mayuh bedau nemu midaka ikan semah tauka ikan empurau. Bisi mega madahka churak kala ikan, bisi ngembuan bibir ti panjai tauka pandak, pemanjai tubuh sereta mayuh agi indikator sida ke nemu. Mina urang ti telaba sereta landik dalam pengawa bemain sungai amai nemu ni bagi ikan semah tauka empurau. Bemain sungai ba aku ditu iya nya urang ti semampai berikan ngena chara nyala, mukat, nimbak ikan sereta mayuh bengkah chara.
Ikan semah enggau ikan empurau udu disebutka bala mensia mayuh laban pengelunak isi iya ti nyamai enti dipanduk ngena chara stim. Ulih ga ikan tu diguring rangkai tang kitai udah rugi ari segi penyamai isi iya pia mega baka vitamin nya nyau lenyau lebuh maya diguring rangkai. Kesuah iya bansa kitai Dayak udu amai deka ngasam ikan semah enggau ikan empurau. Mina diperuk enggau garam kasar sereta berau guring. Diperam enggau pengelama 3 minggu sigi udah nyamai diempa kitai. Lebuh maya manduk kasam tu tadi tau mega digaga bisi ai mimit tauka diguring minyak. Ikan semah enggau empurau tu ukai semina nemu diempa bala bansa Dayak tang bansa kitai menyadi cina, tambi enggau melayu mega nemu.
Pemayuh menua udah ditemu aku di Sarawak sigi enda telabanka bansa menyadi kitai cina Foochow di Sibu dia udu bebelika ikan semah kelebat agi ikan empurau. Tu amat tampak lebuh maya sida iya nyambut Taun Baru Cina. Bansa menyadi kitai cina dipelilih menua bukai pan bisi mega meli tang sigi enda tetapatka sida di pelilih menua Sibu enggau Kapit.
Utai ti ngasuh bangat alit ati iya nya bisi urang sanggup meli siku ikan empurau ti dijual enggau rega RM6,000 lebih. Pekara tu amai nyadi di Pasar Tamu di Kapit dia dalam taun 2010 tu tadi. Peminta ikan empurau enggau semah sigi udu dipinta lebuh maya ari besai cina. Laban rega sekilo ikan semah enggau empurau ti berega dia bansa Dayak udu begigaka ikan empurau tu. Nyau baka kena loteri mih tudah enti bisi bulih ikan empurau. Asai ka ke dalam mimpi ko sekeda ti udah kala bulih ikan empurau nya tadi. Pengudah sida bulih tadi dia sida deka nyual terus nuju ngagai tamu tauka nyual ngagai urang pemborong.
Dalam dua taun ke udah, dia mayuh amai jerita udah pansut dalam suratkhabar tauka internet madahka ikan empurau tu amai ulih ditupi kitai baka ikan ke bukai tang mina chara nya enda sama. Engka nya lebih pedis agi bebanding baka nupi ikan keli enggau ikan talipia. Ari pansik sida ke nemu dia ikan empurau tu tadi digerupka dalam Famili Cyprinidae. Sampai ke saritu mega agi bedau sida ke landik mansik chara bakani nernak ikan empurau tu.
Ari buah randau enggau urang ti kala begigaka ikan empurau sereta semah dia sida madahka endur diau ikan empurau tu sigi ba ulu sungai din ti bisi bebatu besai sereta batu karangan. Ba dia mega sigi udah temu kitai ai sungai ti chiru sereta deras. Nya mih kebuah makin besai buka kompeni balak di ulu din, dia ai sungai nyau majak keruh lebuh maya ujan lebat. Lebuh maya aku enggau urang begiga ikan semah di menua Ulu Baram dia aku tetemuka ikan semah nya tadi balat udu gemuk/beminyak laban ti makai buah ensurai ti bisi ba tebing sungai. Taun 2010 tu tadi, dia balat endar buah dipterokap dalam kampung jerung bebungai. Buah ensurai ti udah cukup mansau lalu labuh ke ai sungai lalu nya mih nyadi pemakai endar ikan semah enggau empurau. Kebuah pia laban aku nguji meruti perut ikan semah ti bisi bulih ba pukat ti ditan kami. Nyau belenying ai pendai ketegal minyak/gemuk ikan semah tu lebuh maya dikirah. Lemak ikan semah tu tadi enda dibuai ngapa. Minyak nya tadi ulih dinyadika kitai nyau sebaka minyak buah engkabang. Wangi amai asi enti digulaika enggau minyak ikan semah. Siti pengiruh ngintu lemak/gemuk ikan semah iya nya nuan deka muai tai ba perut. Enti enda dibuai, dia nuan deka ngasaika pait ba minyak lebuh maya iya udah mansau dipanduk. Lemak/gemuk ikan semah ti udah diintu nya tadi diengkah dalam periuk lalu terus dipanduk ngena api ti mit. Nyau naka pengalama dia minyak/gemuk iya tadi deka melepu sereta bekau perut tai ti enda ulih dibuai nyau tenggelam ba dasar periuk. Laluh perut, tai sereta empedu ti pecah ngasuh minyak nya pait. Ari pengalaman aku empu, enti minyak tu tadi dikena nuan ngecalka asi pulut, sigi naka penyamai iya!
Lebuh maya berikan dia rindu amai narit pukat lebuh maya bisi ngena. Nyau besai betis ikan semah ti diulih kami. Sida ke landik nyelam sambil nimbak ngena senapang ikan, bulih amai laban ba lubuk din sida iya ulih milihka pemesai ikan. Enti beraban raban begiga malam ari dia sida deka bepekit ngigaka ikan semah ti paling besai. Nya mih lebuh maya nuan nemuai ngagai bilik sida di menua ulu baram, dia nuan ulih beratika iku ikan semah tauka ikan empurau ti udah ditetak nya dilekatka sida ba dinding. Makin besai kerembai iku ikan nya, reti iya makin besai mih saiz ikan ti bulih sida.


Siti karakter ikan semah tu iya nya iya enda siga lebuh maya malam ari. Pia mega iya deka begerup enggau pangan diri di dalam lubuk din. Ukai semua sungai ti bebatu sereta karangan bisi ikan semah enggau empurau. Nya begantung enggau pemersi ai sungai mega.
Siti mega info ti ditemu aku ba menua ulu baram ditu iya nya chara sida bejualka ikan semah tauka ikan empurau. Rega iya mina begantung enggau pemerat dibaruh ari sekilo tauka lebih ari sekilo. Nya ba peneka ati diri empu lebuh maya meli.
Labanka projek betupika ikan empurau tu udah amai nyadi nyata baka ti diriput sida dalam suratkhabar, dia aku mesan ngagai bala kitai ti bisi ati deka nguji nernak ikan tu sigi diasuh nemu pekara tu ari pun sampai ke ujung. Ukai mina ninga sereta nerima segala ari urang bukai tang diri empu perlu ngaga pansik sebedau nernak iya. Ari riput suratkhabar dia bisi siku urang dagang di Kuching udah mujur nernak ikan empurau. Pelaba aku asai ikan empurau ari ai sungai asal enggau ti diternak engka enda sama asai. Jaku aku nya tadi mina sagam ati aku din laban kitai nemu karakter ikan tu tadi sigi ba ai sungai ti chiru sereta deras. Engka chara pemakai iya ti kompleks nya mih nentuka penyamai isi iya. Kitai sama bela enda nemu. Sama-sama mih kitai mansik nya.
Pengawa dagang tu ukai ngena kapital ratus ribu tang sigi amai manggai ngagai juta ringgit. Semua urang deka nemu kati baka chara deka nernak ikan empurau laban iya sigi tetap ngenataika asil ti manah sereta ulih dieksport ke menua tasik. Jaku tangkan aku ba ditu iya nya kitai sama-sama nyaga pemersi sungai enggau rampa menoa awaka ikan empurau tu bedau diau ba endur asal iya. Pia mega kena jemah ke anak ucu kitai dudi ari ila.

Penemuruai e-Mag, Volume 03

Penemuruai e-Magazine: Vol.01, 02 & 03
Ingin memiliki Majalah Dayak yg Pertama “Penemuruai e-Mag, Majalah Dayak Rebak Baru”, yang menggunakan format pdf/e-mag.

Gawai Dayak, Promosi ALL SPECIAL: 3-Vol dalam 1

Sila taip SMS : RES[langkah]penemuruai[langkah]Nama anda[langkah]e-mail anda[langkah]Permintaan Vol.01,02,03 atau ALL SPECIAL[langkah]No. hp. anda[langkah]Lokasi/Alamat
Hantar SMS ke : 33228

Kami akan menghantar “Penemuruai e-Mag, terus ke email anda.

Penemuruai e-Mag Volume 02-Majalah Dayak Rebak Baru

From Editor/Writer: Wilfred Sedau

To purchase the 1st Dayak Magazine known as “Penemuruai e-Mag”-Majalah Dayak Rebak Baru in pdf/e-magazine format.

Kindly type your SMS : RES[space]penemuruai[space]Your Name[space]e-mail address[space]Phone Number[space]Location/Address and SEND SMS TO : 33228

We will directly send Penemuruai e-mag to your e-mail address.

Thanks

Best regard;

Penemuruai

Penemuruai e-Mag Volume 02!

Majalah Dayak Rebak Baru-"Penemuruai", Ti Keterubah ia ngena format pdf.

Hi Bala Bloggers!

Keterubah ia meri tabi basa, Merry Christmas&Happy New Year 2010.
Selamat betemu baru kitai dalam Penemuruai. Kena pemuka taun 2010, dia kami sebuat bisi udah ngaga Majalah Dayak Rebak Baru-"Penemuruai".

Tu meh keterubah ia majalah dayak digaga dalam format pdf. Curak sereta batang cherita ti dipantaika dalam Majalah "Penemuruai E-Mag" lebih ngagai pengidup kitai seari sereta info ti tebaru kena napi dunya pemansang. Bala pemacha tau nguji macha laban informasi sereta buah runding enda sama enggau majalah ti bisi ba pasaran diatu.
Ngarapka bala bloggers ulih meri sukung enggau Majalah Dayak Rebak Baru "Penemuruai E-Mag".

Ngagai bala kitai ti beminat deka macha majalah sereta deka nemu lebih silik, tau e-mail ngagai:
wilfred.sedau@gmail.com (Founder of Penemuruai)
penemuruai@gmail.com

Rega "Penemuruai E-Mag" mina rm5 aja, 51 muka surat, Bonus calendar-format excell.
Majalah "Penemuruai E-Mag" dianjung terus ngagai e-mail.

Terima Kasih
Wilfred Sedau
wilfred.sedau@gmail.com
penemuruai@gmail.com