Anang Ngaga Nama Kompeni Pengujung Enggau uruf “A”

Kemaya aritu perintah udu ngasuh kitai nguji dalam pengawa dagang. Tu mih pengawa perintah ti udu deka ngasuh bala kitai bansa dayak nguji dalam pengawa nya. Bisi sekeda sanggup ngambi duit injau ari bank – Agrobank, Bank Rakyat kena ngepun dalam pengawa dagang betanam betupi, begaga ke rumah enggau mayuh utai agi ti enda ulih disebut ba ditu. Pengudah nya enggau urang berkursus dalam pengawa dagang bakani ngaga lessen, cara atur duit enggau utai bukai. Silik amai utai dipadah lebuh maya kitai enggau berkursus pengawa dagang.
Enti kitai deka bedagang dia kitai bisi empu nama kompeni. Nama kompeni tau mega nama kitai empu kini tauka nama ti ngasuh urang bukai ingat. Nyadi ba ditu aku deka bekunsi enggau bala pemacha bisi siti kes udah nyadi ba Kuala Lumpur din. Ketegal nama kompeni ti pengujung enggau uruf “A”, dia bisi kompeni ti udah rugi beratus ribu ringgit.
Lelaki ti ngereja pengawa nipu tu mina deka ngiga nama kompeni ti bepengujung ke uruf “A” aja. Kebuah iya deka ngiga kompeni bakanya laban senang bagi iya ngemansut ke duit ari cek duit. Ke diatu iya udah naban ke duit penyampau RM 500,000 ari dua buah kompeni.
Keterubah iya minta kereja enggau kompeni lalu madahka diri enda ngira penyampau gaji ti dibayar ngagai iya laban iya sigi suntuk deka ngiga kereja. Pengudah iya diterima kereja dia iya mega ngaga kompeni diri empu ti sama nama kompeni endur iya kereja tang mina bepengujung enggau uruf “I”
Lebuh maya General Manager Kujiwa Corporation ditanya, dia iya madahka lelaki nya bepakaian gap lebuh maya iya nurun interbiu. Tambah mega iya kala talipaun ngagai urang ti deka dirujuk (References) lebuh maya interbiu lalu madahka lelaki nya sigi manah. Pengudah iya bekereja enggau kompeni, dia General Manager baru tetemu ka 21 iti cek ti patut disimpan dalam bank udah lenyau. Lelaki nya rejister nama kompeni iya “Kujiwai” lalu nabanka duit penyampau RM 218,000.

Lelaki tu mega udah nipu kompeni ti benama “Aluta”. General Manager Aluta madahka lelaki tu landik amai nerangka bahan kena ngaga rumah. Pengudah lelaki tu bekereja dia iya selalu meri alasan laban enda ulih meri cek ngagai klien iya. Bos iya udah laun nemu laban lelaki nya udah nabanka duit penyampau RM 292,000 kurang dalam dua bulan. Lelaki nya rejister nama kompeni enggau “Alutai”.
Moral jerita tu iya nya enti ulih anang ngaga nama kompeni bepengujung enggau uruf “A”. Laban pekara tu udah nyadi di Kuala Lumpur din. Ngagai bala tauke tauka orang dagang anang ga lalu beguai nukar nama tang perlu nemu sapa enggau kita gawa. Temu silik urang ti bekerja enggau kita. Kekadang bala tauke enda nemu sapa urang enggau iya bekereja laban kelalu sibuk. Kes tu diambi ari artikel “The Star Online-8thJune2009.

Ikan Semah tauka Ikan Empurau?

Uji teka dulu, ikan nama ti bisi ba gambar nya? Pelaba aku agi mayuh bedau nemu midaka ikan semah tauka ikan empurau. Bisi mega madahka churak kala ikan, bisi ngembuan bibir ti panjai tauka pandak, pemanjai tubuh sereta mayuh agi indikator sida ke nemu. Mina urang ti telaba sereta landik dalam pengawa bemain sungai amai nemu ni bagi ikan semah tauka empurau. Bemain sungai ba aku ditu iya nya urang ti semampai berikan ngena chara nyala, mukat, nimbak ikan sereta mayuh bengkah chara.
Ikan semah enggau ikan empurau udu disebutka bala mensia mayuh laban pengelunak isi iya ti nyamai enti dipanduk ngena chara stim. Ulih ga ikan tu diguring rangkai tang kitai udah rugi ari segi penyamai isi iya pia mega baka vitamin nya nyau lenyau lebuh maya diguring rangkai. Kesuah iya bansa kitai Dayak udu amai deka ngasam ikan semah enggau ikan empurau. Mina diperuk enggau garam kasar sereta berau guring. Diperam enggau pengelama 3 minggu sigi udah nyamai diempa kitai. Lebuh maya manduk kasam tu tadi tau mega digaga bisi ai mimit tauka diguring minyak. Ikan semah enggau empurau tu ukai semina nemu diempa bala bansa Dayak tang bansa kitai menyadi cina, tambi enggau melayu mega nemu.
Pemayuh menua udah ditemu aku di Sarawak sigi enda telabanka bansa menyadi kitai cina Foochow di Sibu dia udu bebelika ikan semah kelebat agi ikan empurau. Tu amat tampak lebuh maya sida iya nyambut Taun Baru Cina. Bansa menyadi kitai cina dipelilih menua bukai pan bisi mega meli tang sigi enda tetapatka sida di pelilih menua Sibu enggau Kapit.
Utai ti ngasuh bangat alit ati iya nya bisi urang sanggup meli siku ikan empurau ti dijual enggau rega RM6,000 lebih. Pekara tu amai nyadi di Pasar Tamu di Kapit dia dalam taun 2010 tu tadi. Peminta ikan empurau enggau semah sigi udu dipinta lebuh maya ari besai cina. Laban rega sekilo ikan semah enggau empurau ti berega dia bansa Dayak udu begigaka ikan empurau tu. Nyau baka kena loteri mih tudah enti bisi bulih ikan empurau. Asai ka ke dalam mimpi ko sekeda ti udah kala bulih ikan empurau nya tadi. Pengudah sida bulih tadi dia sida deka nyual terus nuju ngagai tamu tauka nyual ngagai urang pemborong.
Dalam dua taun ke udah, dia mayuh amai jerita udah pansut dalam suratkhabar tauka internet madahka ikan empurau tu amai ulih ditupi kitai baka ikan ke bukai tang mina chara nya enda sama. Engka nya lebih pedis agi bebanding baka nupi ikan keli enggau ikan talipia. Ari pansik sida ke nemu dia ikan empurau tu tadi digerupka dalam Famili Cyprinidae. Sampai ke saritu mega agi bedau sida ke landik mansik chara bakani nernak ikan empurau tu.
Ari buah randau enggau urang ti kala begigaka ikan empurau sereta semah dia sida madahka endur diau ikan empurau tu sigi ba ulu sungai din ti bisi bebatu besai sereta batu karangan. Ba dia mega sigi udah temu kitai ai sungai ti chiru sereta deras. Nya mih kebuah makin besai buka kompeni balak di ulu din, dia ai sungai nyau majak keruh lebuh maya ujan lebat. Lebuh maya aku enggau urang begiga ikan semah di menua Ulu Baram dia aku tetemuka ikan semah nya tadi balat udu gemuk/beminyak laban ti makai buah ensurai ti bisi ba tebing sungai. Taun 2010 tu tadi, dia balat endar buah dipterokap dalam kampung jerung bebungai. Buah ensurai ti udah cukup mansau lalu labuh ke ai sungai lalu nya mih nyadi pemakai endar ikan semah enggau empurau. Kebuah pia laban aku nguji meruti perut ikan semah ti bisi bulih ba pukat ti ditan kami. Nyau belenying ai pendai ketegal minyak/gemuk ikan semah tu lebuh maya dikirah. Lemak ikan semah tu tadi enda dibuai ngapa. Minyak nya tadi ulih dinyadika kitai nyau sebaka minyak buah engkabang. Wangi amai asi enti digulaika enggau minyak ikan semah. Siti pengiruh ngintu lemak/gemuk ikan semah iya nya nuan deka muai tai ba perut. Enti enda dibuai, dia nuan deka ngasaika pait ba minyak lebuh maya iya udah mansau dipanduk. Lemak/gemuk ikan semah ti udah diintu nya tadi diengkah dalam periuk lalu terus dipanduk ngena api ti mit. Nyau naka pengalama dia minyak/gemuk iya tadi deka melepu sereta bekau perut tai ti enda ulih dibuai nyau tenggelam ba dasar periuk. Laluh perut, tai sereta empedu ti pecah ngasuh minyak nya pait. Ari pengalaman aku empu, enti minyak tu tadi dikena nuan ngecalka asi pulut, sigi naka penyamai iya!
Lebuh maya berikan dia rindu amai narit pukat lebuh maya bisi ngena. Nyau besai betis ikan semah ti diulih kami. Sida ke landik nyelam sambil nimbak ngena senapang ikan, bulih amai laban ba lubuk din sida iya ulih milihka pemesai ikan. Enti beraban raban begiga malam ari dia sida deka bepekit ngigaka ikan semah ti paling besai. Nya mih lebuh maya nuan nemuai ngagai bilik sida di menua ulu baram, dia nuan ulih beratika iku ikan semah tauka ikan empurau ti udah ditetak nya dilekatka sida ba dinding. Makin besai kerembai iku ikan nya, reti iya makin besai mih saiz ikan ti bulih sida.


Siti karakter ikan semah tu iya nya iya enda siga lebuh maya malam ari. Pia mega iya deka begerup enggau pangan diri di dalam lubuk din. Ukai semua sungai ti bebatu sereta karangan bisi ikan semah enggau empurau. Nya begantung enggau pemersi ai sungai mega.
Siti mega info ti ditemu aku ba menua ulu baram ditu iya nya chara sida bejualka ikan semah tauka ikan empurau. Rega iya mina begantung enggau pemerat dibaruh ari sekilo tauka lebih ari sekilo. Nya ba peneka ati diri empu lebuh maya meli.
Labanka projek betupika ikan empurau tu udah amai nyadi nyata baka ti diriput sida dalam suratkhabar, dia aku mesan ngagai bala kitai ti bisi ati deka nguji nernak ikan tu sigi diasuh nemu pekara tu ari pun sampai ke ujung. Ukai mina ninga sereta nerima segala ari urang bukai tang diri empu perlu ngaga pansik sebedau nernak iya. Ari riput suratkhabar dia bisi siku urang dagang di Kuching udah mujur nernak ikan empurau. Pelaba aku asai ikan empurau ari ai sungai asal enggau ti diternak engka enda sama asai. Jaku aku nya tadi mina sagam ati aku din laban kitai nemu karakter ikan tu tadi sigi ba ai sungai ti chiru sereta deras. Engka chara pemakai iya ti kompleks nya mih nentuka penyamai isi iya. Kitai sama bela enda nemu. Sama-sama mih kitai mansik nya.
Pengawa dagang tu ukai ngena kapital ratus ribu tang sigi amai manggai ngagai juta ringgit. Semua urang deka nemu kati baka chara deka nernak ikan empurau laban iya sigi tetap ngenataika asil ti manah sereta ulih dieksport ke menua tasik. Jaku tangkan aku ba ditu iya nya kitai sama-sama nyaga pemersi sungai enggau rampa menoa awaka ikan empurau tu bedau diau ba endur asal iya. Pia mega kena jemah ke anak ucu kitai dudi ari ila.

New e-Book Launching On August 2010 "Bungai Kuntau Pengidup" The first ever e-book in Dayak-Iban language

This new sharing ideas & concept similarity with Kuntau
martial art will go a long towards surviving the challenges of
daily life and development transition

Author : Wilfred Ak. Sedau
http://dipenemuruai.blogspot.com

Kati Chara Nguruska duit RM10,000?

Kati Chara Nguruska duit RM10,000?

Pemungkal taun 2010 bisi sekeda gaga ati, bisi ga sekeda agi bedau ngigatka taun 2009. Sida ke gaga ati nya engka enda sabar deka ngepun semua pekara ti baru. Pia mega sida ke susah ati engka taun 2010 mayuh pengawa deka diadu tauka bisi penanggul enda ulih diputarka dalam taun 2009. Jaku tangkan ba ditu iya nya kitai patut nemu ngawal sagam ati din.

Enti kitai mulaika kenang baru ngagai taun 2009, dia kitai bisi udah ngasaika enggau gaya ekonomi ti enda manah. Ukai menua Malaysia aja ti tekena gaya ekonomi bakatu tang mega nyadi ba menua ti besai sereta kaya baka Amerika Syarikat, Jepun sereta lebih mayuh agi.

Lebuh maya pemisi ujung taun 2009, dia aku bisi ninga sekeda bala kitai ti sebana enggau mata duit ti enda cukup ba bank. Bakatu segenteran jaku ti dinga aku ba belah kedai kupi “…..susah amai tu, iya ga ka krismas, pia mega ujung taun sereta bepungkal nembiak sekula….” Nyau berunding ati diri ga tudah aku, susah amai sida ti begaji mit laban rega barang nyau majak niki bebanding enggau taun-taun ke udah.
Ingat mih bala pemacha, suntuk duit sereta gaya ekonomi ti enda manah tu ukai mina nyadi ba nuan siku aja tang nyadi ba semua urang. Nyadi kediatu iya nya kati chara kitai deka ngawal sereta ulih idup dalam gelumbang ekonomi ti enda manah tu.
Dalam artikel tu aku deka ngemai bala pemacha sama berunding kati chara nguruska duit enggau penyampau RM10,000.

“Apu..ngumba-ngumba sida editor tu nyebut penyampau duit nyau RM10,000, seribu kada bisi dalam bank” ko sedeka mulut ga nyau engkerasak.

Anang teperasa kita bala pemacha laban bisi sekeda antara kitai nerima duit RM10,000 tauka lebih lebuh maya pun taun 2010. Kebuah aku madah pia laban kitai bebansa dayak diatu nyau udah ngeleda ari tinduk sereta nemu nyimpan duit dalam ASB (Amanah Saham Bumiputra). Nilai penyampau duit RM10,000 engka ari bungai ASB. Nibuh sebut ke sida ti nerima begaji manggai RM10,000 tauka lebih ari nya. Nya nyau udah rezeki diantara kitai mega.


Pulai ngagai cherita kati chara deka nguruska duit RM10,000. Ni ke manah ambi mih, ti enda ngam enggau diri empu, buai mih ke tisi. Nyadi tu bisi sekeda chara kati baka kitai nguruska duit penyampau RM10,000 :

RM RM RM RM RM RM RM RM 10,0000

3. Nambahka Duit Simpan
Tajapan ekonomi enda manah tang kitai enda ulih sekali ngetu nyimpan duit tajapan penyampau iya mimit. Enggau penyampau duit RM10,000 nya tadi nuan ulih nyimpan dalam saham baka ASB laban bungai ti diberi sida tinggi bebanding produk utai bukai sereta dijamin sida Bank Negara. Tambah mega nuan ulih nyimpan duit nya dalam skim SSPN (Skim Simpanan Pendidikan Nasional) sereta ulih nyeliahka diri dikena cukai enggau penyampau RM3,000.00. Sida SSPN udah kala meri bungai duit penyampau 4% dalam taun 2005 bebanding enggau produk pendidikan bukai mina 1.5% ngagai 3.1% aja. Pemanah bukai iya nya anak kita enda tusah sema jaku deka nampung belajar ke tikas lebih tinggi.

4. Enggau Kursus Kena Ningkatka Pengelandik Diri Empu
Diatu mayuh amai jenis kursus udah disediaka ari sida perintah sereta kompeni besai bukai. Kursus ti suah dipeda kitai kemaya aritu iya nya kursus pengelandik bejaku, manduk utai, betanam betupi, bejait baju sereta mayuh agi. Sida ti deka ningkatka pengelandik diri empu tau ngena duit nya tadi belajar utai ti baru. Pengudah ambis ngambi siti-siti kursus nya tadi, sida tau muka pengawa dagang diri empu. Enti udah 3 taun bedagang ulih mayar pulai baru penyampau rega kursus ti udah dibayar.
Paling mudah pan belajar enggau urang manduk lauk sereta kuih. Dalam masa ti sama, ungkus belanja ba ruang siti bilik ulih dikurangka laban jarang makai ba restoren. Ngambi kursus tu enda rugi enti nemu mulaika baru ngagai penguntung diri empu sereta ruang bilik.

5. Belajar Jaku Baru
Pengelandik bejaku sereta bisi ngembuan bejaku bansa bukai manah amai enti kereja ba kompeni besai pia mega enggau kereja perintah. Penyampau rega kena belajar jaku bansa bukai iya nya RM1,000.00 dalam sebulan. Jaku ti popular deka dipelajarka iya nya jaku Mandarin, Jipun sereta Korea. Lebuh maya nembiak sekula pemisi, nuan ulih nganjung anak nuan ngagai kelas belajar jaku bukai. Kesuah iya yuran ti deka dibayar nitihka pengelama kelas. Ngambika chunto seminggu belajar deka bebayar RM700.00 tauka RM1,200.00 dalam duaminggu.

6. Ngaga Pengawa Dagang
Ngagai bala kitai ti landik bedagang nya sigi disagi kitai awaka terus besai pengawa dagang iya. Duit nya tadi ulih kena nuan ngepunka pengawa dagang. Ngambika chunto ngepunka pengawa dagang bejual kuih. Ngepunka pengawa dagang tu sigi ari ati diri empu ti keran deka mansang dalam pengawa dagang. Enti nadai minat dalam pengawa dagang, nya nyau majak ngemediska diri dudi ari ila. Ukai semua urang mega ulih bedagang. Tiap iku kitai sigi udah ngembuan pengelandik diri empu ti diberi petara.

7. Meli rumah
Nuan mega tau meli reta dikumbai kitai aset baka chunto rumah tauka tanah. Enggau penyampau RM10,000 nya tadi, nuan ulih mayar deposit rega rumah/flat rega sederhana murah. Pia mega ulih nampung mayar yuran luyar kena nguruska dokumen rumah. Ingat meh, tip ti paling penting dalam meli rumah iya nya endur ti strategik.

8. Nyaga Urang Ti Disayauka Nuan
Duit nya tadi ulih dikena nuan nyaga urang ti disayauka nuan. Ngambika chunto bini enggau anak, bala apai indai. Duit nya tadi ulih disimpan kena lebuh maya begunaka maya sakit. Pia mega nuan ulih ngambika sida insurans awaka kitai enda merinsa lebuh maya sida sakit tauka kena penanggul ti enda disada.

9. Bejalai Melancung Ke Menua Bukai
Bejalai ke menua bukai sereta menua baru ditujah nuan nya ulih ngelepaska stress ti dikembuan nuan ngelama tu. Dalam masa ti sama nuan ulih belajar utai ti baru endur menua ti digagai nuan nya. Ngambika chunto gaya pemakai ti baru, endur merindang ati, chara sida bedagang. Ari nya tadi nuan ulih mikirka nama batang pengawa dagang ti deka dipunka nuan dudi ari ila. Bejalai melancung ke menua bukai ulih nambahka penemu baru kitai mega.

Bansa Dayak-Iban, Mayuh Kereja Tasik (Oil&Gas)

(Keratan suratkhabar tu diambi ari The Borneo Post, July 2009)


Kala macha artikel tu ba suratkhabar “The Borneo Post”-July 2009? Aku nyau enda ingat kemaya tarikh iya dipansut ba suratkhabar.
Lebuh maya aku meda tajuk artikel tu, dia aku amai tetarit ati lalu ngambi gambar artikel tu laban deka bekunsi enggau bala pemacha.
Lebuh maya ari besai Gawai Dayak, aku rindu bendar ninga cerita bala sida anggat berjerita ke pengawa diri empu di menua tasik kelebih agi sida ti kereja tasik tauka suah agi dikangau sida “Kereja Offshore”.

Nyau pesap-pesap mata sida ke tuai laban ninga jerita barang pemakai ti diempa ba nalan endur kereja. Aku nyau tenguk mih ninga sida kereja offshore makai 6 kali dalam seari. Bala tubuh anembiak ti kurus pengudah kereja nyau majak gemuk sereta tegap.
















Tang ingat mih bala pemacha laban kereja tasik tu ukai mudah baka ti dijangka kitai magang. Kena panas, kena ujan, macham-macham mih. Ukai semina nya aja tang bisi mega bebadi lebuh maya kereja. Ari pangkat tinggi ngagai ke baruh sigi bisi ngembuan tanggungjawab ti berat. Mina urang ti liat ati aja ulih mujur dalam pengawa bakatu.

Enti nitihka repot dalam artikel suratkhabar tu, dia pekerja biasa aja ulih RM320 seari. Sema jaku kereja dalam sebulan, RM320x30 ari. Berapa penyampau mata duit ti diterima sida dalam sebulan? Apuuu…. Enda alah nya wai. Tang tu mih realiti gaji kereja offshore.

Pia mega bansa kitai iban kelebat agi gawa kereja offshore ba seluruh pelusuk dunya. Ngambika banding di menua Saudi Arabia, Dubai, India, Vietnam sereta mayuh agi tempat. Retinya bansa kitai iban ulih napi kereja tasik sereta ulih nempah nama ba seluruh dunya. Tu mih pengeliat ati ti patut dikemeran ngagai bansa kitai.



Ba ditu aku deka bekunsi enggau bala pemacha iya nya lebuh maya aku pulai cuti ari Miri ke Kuching, aku nepan sama bas enggau siku urang ti bekereja “offshore”/kereja tasik ba menua Arab Saudi, iya madah udah kereja enggau pengawa tu pengalama 20 taun. Iya madah ke diri empu bekereja ari baruh dulu. Tambah mega iya madahka suah enggau course laban pengeran ati deka niki ke pangkat sereta skill dalam pengawa offshore. Tajapan rega course tu mar tang iya sanggup nyimpan duit laban deka bersedia enggau course nya. Mayuh mih utai dikerandau kami duai lebuh maya dalam bas nya. Topik dikerandau kami duai ari mula iya nya iya memula kena intebiu sereta course ti udah iya enggau. Bisi sekeda ngasuh ketawa laban lebuh maya iya enggau “Course-Sea Survival” dia sida bisi tubuh 4 iko berebut pansut ba siti pintu bilun engkabang lebuh maya deka dilabuh ba kolam. Enti nitihka ajar sida cikgu, sigi pansut ba pintu diri empu mih. Nya mih sekeda pengalaman kereja iya dikunsi enggau aku.

Pengeliat ati bakatu enda mina ba pengawa kereja offshore tang ulih dipantaika ba sektor pengawa bukai. Enti kitai ulih meri chunto pengeran sereta pengeliat ati ba kereja offshore lapa enda ulih ba bidang bukai? Tu mih perangsang kena kitai maju ke depan!

Kala ninga kempen enda ngena plastik?

Kala ninga kempen enda ngena plastik? Nyadi kempen tu udah lama digaga sereta deka diteritka enda begunaka nya mulai tanggal 1 aribulan May 2010. Nyadi kempen tu amai udah nyadi kelebih agi di menua Miri enti dipeda ari rambang mata tajapan pelilih menua bukai pan udah mega nyaut kempen baka nya.

Retinya tadi enti kitai ngusung ngagai endur bebelika utai barang dapur tauka utai bukai ngambika chunto baka The Giant, Servay, Boulevard kelebat agi. Dia baka ke udah enti tekenaka ari lima, enam sereta ari minggu sigi nadai disediaka plastik kena ngemai barang ti udah dibeli. Ka pan enda ngena kotak ti bisi ba tisi endur kaunter nya tadi mih. Nyau beringkuh-ringkuh sekeda bala dipeda mata aku lebuh maya aku bisi tepansa utai pekara bakanya. Tu mih dikumbai kitai kempen nadai bekenaka plastik.

Tuju kebendar iya perintah merambu kempen ke baka tu laban semua urang udah sedar penuai umur dunya kitai tu. Arinya tadi dia kitai pan udah nemu reti nyaga pemersi angin sereta rampa menua lalu kempen tu diperambu perintah. Nemu kitak, plastik tu enda ulih diancur baka utai bukai? Sema jaku plastik tu tadi dibuai kitak ba tanah tauka ba sungai dia iya ngambi beratus tahun kena ancur. Sema jaku ulih diancur pan tang pengelama tahun nya enda setipak enggau penyampau plastik ti udah dikena. Ngambika chunto, dalam seminit berapa iku urang ngena plastik ba kedai? Ngambika chunto dalam seminit bisi 50 iku urang ngena iya. Nya baru semina ba siti kedai aja, kati baka kedai bukai dih? Kati baka dalam siti Sarawak tauka ba siti Malaysia dih? Seluruh dunya? Mayuh nya enti dipeda kitai ari aspek masa. Ari segi tu enda aku ulih meri fakta ke bendar iya. Awaka bala sida saintis mansik pekara bakatu mih.

Pulai baru kitai ngagai jerita kempen enda bekenaka plastik. Enti dipeda ari rambang mata lebuh maya kitai bejalai ngagai endur bebelika utai dia ulih beratika bisi logo, lambang, notis ti madahka enda bekenaka plastik lebuh maya ujung minggu.

Nyadi ba ditu aku deka bekunsi pengalaman enggau bala pemacha. Pekara tu suah amai nyadi ba tubuh aku empu lebuh maya bebelika utai ba kedai besai baka Servay, The Giant, Boulevard iya nya lebuh maya ari enam. Pengudah ngambi barang ti ka diguna, dia aku lalu terus ke kaunter laban ka bebayar.

“…semua RM159.95..” ko indu ba kaunter.

“ok, ada plastik ka?” ko aku nguji nanya indu ba kaunter nya. Sigi udah nemu ga aku nadai bekenaka plastik lebuh maya ujung minggu. Enggai enda nanya mih nya. Ari segi nya tadi sigi udah salah ga tudah aku. Laban ke bedau teleba bebaika beg ari rumah ke kedai nya mih ngasuh aku enda ngemai.

“Ada plastik tapi mau bayar rm0.20 untuk satu plastik..” ko indu ba kaunter nya sambil nyengkau enggau penyampau tiga iti plastik ti bisi ngerang ba ujung kaunter. Senyum-senyum ga iya meda aku enda nemu nama kebuah.

Nyadi semua utai dibayar aku tadi iya nya RM159.95 sereta iya meri resit sereta barang ti udah dibeli lalu diengkah iya dalam plastik. Penyampau rega plastik RM0.60 nya terus diberi aku ngagai indu nya ga.

Pansut aku ari kedai, dia aku berunding baru. Kati baka pemanah kempen nadai bekenaka plastik? Amai ngasi kempen enda bekenaka platik nya kini? Berindik arinya tadi dia pekara tu ukai nyadi ba aku aja tang ba urang bukai. Sida ke bebelika barang ti mayuh sereta bisi sekeda barang besai sereta enda ingat plastik tepaksa meli plastik kena ngemai barang ti udah dibeli. Nyadi ba sagam ati aku din, ngagai bala sida ti bisi ngembuan gaji ti besai pelaba aku nadai masalah enti bebelika plastik rega RM0.20 siti. Kati baka sida ti nadai endar penatai pemisi dih?

Tajapan sida kompeni kedai ngenaka RM0.20 ba siti plastik iya nya chara alus kena ngukum sereta siti chara kena urang ngasuh ngemai beg kediri empu ke kedai tang ari penemu aku empu sigi enda efektif. Nama kebuah aku madah enda efektif iya nya petama ngena belanja baru, ngambika chunto rega barang ti udah aku beli iya nya RM159.95 sereta ditambah baru enggau rega 3 iti plastik iya nya RM0.60, semua iya RM160.55. Mayuh utai penyampau RM0.60 nya, enti ulih ga kena nampung rega paking kerita, pama ga agi. Kedua iya nya, enda ngena ba timang jaku “Kempen tanpa Plastik”, enti ditranslet kitai ngagai jaku iban iya munyi bakatu “Kempen nadai Plastik”, retinya sigi nadai sekali bekenaka plastik. Nya iya paling ngam.

Aku ba ditu ukai mangkang perambu perintah enggau kempen bakatu tang mina ulih meri idea sereta komen laban udah diteresa enggau dipeda mata diri empu. Enti kitai amai nyukung perambu perintah bakatu ukai semina ba sida konsumer tang ngagai bala sida kompeni kedai besai mega. Sama-sama patut seati enti deka nyaga pemersi menua. Ingat mih objektif kitai deka nyaga pemersi angin tauka utai bukai iya nya mina SEATI. Tang ari segi tu sida ti landik manipulasi peluang dagang terus mansang sereta bulih untung. Dalam masa ti sama kitai ti bisi ngembuan raga rutan tauka selabit rutan tau mega dibai kitai kena nyimpan barang nya tadi. Nibuh agi ngena plastik. Tu mih peluang dagang ngagai bansa kitai Dayak begagaka raga ti cukup iya saiz kena dijual ba belah pasar tamu. Sama-sama mih kitai nyukung “Kempen tiada plastik”!

Penemuruai e-Mag, Volume 03

Penemuruai e-Magazine: Vol.01, 02 & 03
Ingin memiliki Majalah Dayak yg Pertama “Penemuruai e-Mag, Majalah Dayak Rebak Baru”, yang menggunakan format pdf/e-mag.

Gawai Dayak, Promosi ALL SPECIAL: 3-Vol dalam 1

Sila taip SMS : RES[langkah]penemuruai[langkah]Nama anda[langkah]e-mail anda[langkah]Permintaan Vol.01,02,03 atau ALL SPECIAL[langkah]No. hp. anda[langkah]Lokasi/Alamat
Hantar SMS ke : 33228

Kami akan menghantar “Penemuruai e-Mag, terus ke email anda.