Penemuruai Visitors:

Friday, April 20, 2012

The first ever e-book "Bungai Kuntau Pengidup" in Dayak-Iban language



Pemujur enggau pemerinsa pengidup kitai saritu enda sama enggau jeman maya aki ini kitai kelia munya. Enti urang agi munya mina bekeringka pemerani tang kitai diatu betungkat sereta betulang belakangka penemu baru kena napi pemansang dunya ti bangat jampat. Enda ulih kitai nyemaka dunya kelia iya nya agi ngemeran pengawa ngayau ke gagit ati matak kayau tauka bepumpungka pala munsuh. Diatu dunya penuh enggau pemansang sigi enda ngemelakangka pemandai besekula. Semua utai udah berubah enggau naka penyampat. Sekelip mata.

Ari nya tadi aku beratika ba mata kasar iya nya bansa kitai Dayak kelebat agi bedau tinggal ari pemansang menua. Kitai sama bela enda nemu dini endur kitai diatu – ditinggal tauka seperau enggau urang ti udah mansang? Ukai mega deka nekanka majoriti bansa kitai Dayak ti tinggal dalam timang pemansang tang mina segerempung aja ti bedau ngasaika buah penyenang pengudah merdeka. Ari ti enda ampit ngasaika penyenang nya tadi ngasuh sida agi bedau nuntutka penyenang ba bagi sida. Kitai deka ngasuhka penyenang sereta pengaya tu diselemburka ngagai tiap pelilih menua kitai. Sida ti dikumbai kitai segerempung aja tu mih patut ditarit sama dalam arus pemansang. Anang betinggal-tinggal. Anang ngembuan kepapas enggau pangan diri. Kitai sama bela nemu kemaya aritu tiap urang nyau bepekit kena ngulihka pengelantang. Anang mih agi lunggu, dani mih ari tinduk sereta angkat enggau urang bepekit ngena chara ti manah. Enda alah kitai nyau belama berundingka rangkang kayu ti semampai deka nyekat pejalai kitai. Berunding mih bakani deka nyeliahka sereta ngemutarka rangkang kayu nya tang ukai deka ngenangka bakani rangkang kayu nya tau ba dia. Sama mih kitai ngasaika pengelantang sereta ngulihka asil ti meruan.

Awaka aku nerangka tibak penemu ti bisi dalam e-book ti benama “Bungai Kuntau Pengidup”. Pelaba aku, ari nama nya tadi kitai ulih ngambarka bakani jalai jerita sereta buah runding ti deka dipejuraika sereta dikunsi enggau bala pemacha. Nya mih E-book tu ukai mandangka jerita kelia tang iya kelebih agi nekanka tips motivasi tauka buah runding bakani chara idup ti ulih ngasuh kitai terus mansang sereta mujur ba pengawa seari-ari. Buah penemu tu ukai dituntut ari guru kuntau, manang tauka beliau tang diberi sereta diajar nyengala ari apai indai aku empu. Latar belakang apai enggau indai aku mina baka urang bukai ti napi pengelantang dalam arus pemansang. Aku ulih ngasaika ajar sereta buah penemu ti udah diajar sereta diberi seduai nya amai beguna ba jalai pengidup ti deka mujur dalam semua pengawa. Tajapan apai enggau indai aku ukai peturun urang ti tebilang tang aku bemegah ati laban bekunsika buah penemu tu enggau bala mayuh. Ari nya tadi, aku berundingka enda memalu deka bekunsika penemu tauka tips enggau bala pemacha. Nya mih kebuah aku natakka nama e-book tu tadi enggau “Bungai Kuntau Pengidup”.

Kitai sama bela nemu bansa Dayak pan bisi ngembuan main adat asal baka main jari iya nya kuntau. Enti diperipihka kitai bungai sereta buah kuntau Dayak-Iban, pelaba aku mayuh iya. Kebuah pia aku madahka mayuh bungai kuntau laban aku diri empu pan enda landik dalam main jari baka urang bukai. Lain guru kuntau, lain ga chara buah sereta bungai dipantaika. Kuntau Dayak-Iban tu siti main tauka adat kena nyaga tubuh diri empu lebuh maya betembung enggau munsuh kelebih agi maya agi kacau suba. Diatu iya nyau nyadika main asal lebuh maya Gawai Dayak. Ari leka jaku “Bungai Kuntau” nya mih aku tetarit ati laban konsep ngidupka diri nyau ka sebaka. Pia mega enggau pengawa kitai Dayak-Iban ti udu bejalai nujah menua ngiga rejeki. Retinya “Bungai Kuntau” tu disebaka enggau chara ngidupka diri dikena ngemutarka penanggul dalam pengidup.

Tuju e-book tu ti dikarang laban munyi aku ari pun tadi ngasaika bungai kuntau pengidup sigi patut dikunsi enggau bala mayuh. Sema idea tauka buah runding enda ngena ba penemu kita empu, aku nusun sepuluh jari minta ampun. Enti sema bisi penemu tauka idea ti baru tau mega dikunsi enggau aku ditu. Kebendar iya e-book tu dikarang awaka ulih muka runding. Awaka kitai sama betatika dini alai endur kitai diatu.

Jaku ti dikena dalam e-book tu iya nya Dayak-Iban. Kitai anembiak rebak baru patut ngemeranka pengawa ngerebaika jaku iban awaka iya enda lelak dudi ari ila. Identiti kitai patut ditanka tajapan arus pemansang bangat jampat. Aku ti ngarang e-book “Bungai Kuntau Pengidup” ti naka iya ngena leka jaku iban ti betul nitihka standat. Enti sema bisi genteran jaku tauka leka jaku ti enda ngena, aku amai minta ampun. Sama-sama mih kitai ngangkatka jaku Dayak-Iban. Munyi ko urang pengawa ti mujur jarang enda nengah jalai penguji.

Kepenudi iya enda tinggal mega meri besai terima kasih enggau bini aku, apai indai, menyadi sereta kaban belayan ti enda leju meri sukung motivasi dalam ngereja pengawa ngasilka e-book “Bungai Pengidup Kuntau”. Ngarapka bala sida pemacha ulih nerima pengawa aku ti ngasilka e-book tu.

Selamat Macha…
Pengarang, “Bungai Kuntau Pengidup
Wilfred Ak. Sedau 

Sunday, April 15, 2012

Print Your Name on Jerseys











Tuesday, April 3, 2012

Petrol Dealers Association

Price of RON97 petrol to go up by 10 sen to RM2.90 at midnight today (4th April 2012);RON95 and diesel prices to remain the same.
(Sources The Star via sms update)